سؤال مهم بسأله لنفسي كل يوم
ليه في ناس بتتظلم وبتدفع تمن حاجة معملتهاش؟
ببساطة الظلم موجود في الدنيا لكن ربك موجود يظهر الحق ويرجعه لاصحابه ولو مخدتش حقك في الدنيا
هتاخده في الآخرة
…
انا مليش ذنب في موتك.. وعيالي ملهمش ذنب.. قوليلهم يبعدوا عن عيالي.
كانت ساكتة وعلى وشها ابتسامة انتصار.. كنت سامع صرخات عيالي ومراتي.. وانا بصرخ فيها وبقول هما ملهمش ذنب.. اقتليني أنا
فوقت علي صوت مراتي بتقولي اصحي.. اصحي ده كابوس
فوقت وقومت من السرير عشان اشرب
لكن انا لقيت مراتي في الصالة
رجعت الاوضة عشان اشوف مين الي صحتني دلوقتي.. وهنا كانت الصدمة
…
أوهام الجن
الجزء الاول
مش هقدر اقول اسمي الحقيقي عشان انا دكتور نفسي مشهور.. لكن خليني اقول أنا اسمي فهمي
عندي 45 سنة.. متزوج وحياتي مستقرة والحمدلله
وعندي ولد
أنا من محبي قصص الرعب خصوصا المجال بتاعنا مليان بقصس غريبة قريبة للخيال عن الواقع
لكن ممكن تكون حصلت.. العلم عند الله
..
قصتي بتبدأ من يوم عادي جداً في الشغل كنت خلاص همشي.. لكن الباب خبط.. دخل سعد اللي شغال معايا وقلي
_في واحد عايز يقابلك يا دكتور.. بس شكله غريب شويه
_ غريب ازاي يعني؟
_ راجل كبير في السن.. بس عامل زي المدمن زي ما يكون منمش من فترة
_ تمام خليه يدخل
…
دخل واحد في الستينات من عمره.. دقنه كبيرة وشه مليان تجاعيد.. تحت عينيه سواد كانه منمش من شهور.. بيشرب سيجارة وايده بتترعش
وقلي
_ حضرتك دكتور فهمي صح؟
_ايوة انا.. اتفضل حضرتك اقعد.. حضرتك شكلك تعبان
_ لازم اكون تعبان.. انا لسه خارج من مستشفى المجانين بعد 25 سنة فأكيد لازم اكون تعبان
_ ليه.. ليه المدة دي كلها؟
_ مش كتير علي واحد قتل مراته وعياله!!
_ ليه.. قتلتهم ليه؟
_ أنا جيت عشان احكيلك وعاوزك تسمعني وتقولي اذا كنت أنا مريض نفسي ولا لا
…
قام من مكانه ومدد علي الشيزلونج ورجع لورا وانا بدأت اسجل اللي هيحكيه بصوته ده طبعاً بعد أذنه
واتكلم وقال والدموع نازلة من عينيه
_ خاينة.. هي خاينة، الدكتور بيكدب.. دول مش عيالي أنا عقيم مش بخلف
_ استهدي بالله كده واهدي واحكيلي كل حاجة من البداية.. عرف نفسك واحكي
…
أنا اسمي إياد مصطفى.. كنت شاب في التلاتين من عمره.. بشتغل مهندس في شركة مقاولات كبيرة.. متجوز بنت عمي زينب وعندي منها ولد وبنت.. حسن.. وملك
انا المشرف علي شغل المقاولات في اي عمارة بتكلف بيها.. ومسؤول عن تسليم العقار لصاحبه
الدنيا كانت ماشية تمام جداً.. لحد ما قابلت الست صفاء.. واللي بتبدأ من عندها قصتي
..
الست صفاء علي حسب كلام الناس ست مجنونة ليها في الدجل والسحر والنصب
دايما لابسة عباية بيضة ماشية بيها في الشوارع
في اليوم ده أنا فاكر كويس.. كان آخر يوم شغل في العمارة دي.. وصلت قبل العمال عشان اشيك على العمارة.. هي من 6 ادوار كل دور فيه شقتين.. طلعت العمارة لحد ما وصلت.. الدور التالت لقيت الست صفاء بترسم اشكال ورموز غريبة علي الحيطان
..
قربت منها وانا بقولها
_ أنتي بتعملي اي هنا يا ست انتي.. اطلعي بره
_ انت ملعون زيهم.. وهتموت زيهم
_ طيب اطلعي بره.. انتي ست كبيره ومش عايز اتصرف تصرف اندم عليه
..
كنت كل ما اقرب منها ترجع لورا وتقول كلام مش مفهوم.. اشبه بالتعاويذ
بس مخدتش بالها انها بترجع والبلكونة وراها عايز اقولها لكن مش سمعاني من الكلام اللي بتقوله
وللاسف وقعت من البلكونة.. واخر حاجة سمعتها كانت صرختها
بصيت عليها من فوق كانت سايحة في دمها ماتت وانا مش فاهم هي كانت بتعمل اي
..
طبعاً الاسعاف جات والشرطة.. ورحت معاهم والحمدلله شهادة الناس كانت في صفي خصوصا الناس اللى شافتها وهي بتقع من البلكونة.. قالوا وقعت لوحدها
خرجت بس لسه التحقيقات شغالة
..
كنت فاكر ان الموضوع خلص.. لكن لا دي كانت بداية المعاناة
رجعت البيت متأخر مراتي وولادي نايمين.. دخلت السرير ونمت لكن الله اعلم اللي شوفته ده كان حلم ولا كابوس
شوفت نفسي واقف في شارع ضلمة الارضية من الطين وصوت البرق والرعد في السما مخلي الجو مخيف
بس مش ده بس اللي مخيف.. اللي مخيف بجد هي الجثة اللي أنا شايلها علي ايدي
جثة الست صفاء.. كنت ماشي بيها مسلوب الارادة.. علي يميني وشمالي بيوت كتير وقدام كل بيت كلب اسود ضخم عينيه اشبه بالنار
لحد لما وصلت لبيت.. الكلب اللي عنده اتحرك ناحيتنا ومشي معانا لحد البيت
دخلت البيت.. وفي الصالة 6 ستات.. عاملين حركة دائرية ولابسين اسود.. وست قاعدة في نص الدايرة لابسة ابيض في ابيض وعلي وشها وشاح وشلته.. عينيها كانت اشبه بتجويف فاضي بينزل منه دم.. هي الست صفاء
اما باقي الستات بصولي كلهم في وقت واحد
وشوش مطموسة مفهاش ملامح.. وصرخوا وقاموا بسرعة ونظام اخدوا مني الجثة
خرجت اجري بره البيت.. الكلاب كلها هجمت عليا.. فضلت اجري منهم علي قد ما أقدر لكن وقعت وبدأوا يقطعوا في لحمي
…
ها ها صحيت.. صحيت وانا باخد نفسي بالعافيه.. هو في أي.. في أي؟
لقيت مراتي بتقولي اني بجيب سيرة واحدة اسمها صفاء.. وبتقولي مين صفاء دي؟
بصراحه مكنتش فايق لشكها فيا.. أنا فيا اللي مكفيني
سبتلها البيت وخرجت أتمشي حاسس أني مخنوق وعايز اشم شوية هوا
فضلت ماشي مش عارف أنا رايح فين؟
لحد ما لقيت نفسي في شارع.. انا عارفه شوفته من شويه في كابوس مفزع
هو انا جيت هنا أزاي؟
…
في الوقت ده قطع تفكيري صوت واحد بيقولي.. أنت اي جابك الشارع ده يا أستاذ هو انت منهم
بصراحه مكنتش مركز في كلامه لكن ده تاكس فرصة ارجع بيتي انا مش عارف هرجع أزاي ولا انا فين اصلا؟.. ركبت معاه
واتكلم وقال من غير ما اسأله
الشارع ده يا استاذ اسمه الشارع المشؤوم بسبب ان البيوت اللي فيه كلها اتحرقت.. بسبب واحدة وجوزها.. ابنهم كان عنده مرض وحش ومات عند دكتور وهو بيحاول يعالجه
ومن يوم ما ابنهم مات
وكل بيوت الشارع بتتحرق والناس طفشت بس هي اتوعدت انها هتنتقم من كل واحد كان السبب في موت ابنها
..
وهو بيتكلم تليفوني رن.. كان الاستاذ عماد صاحب العمارة.. وقلي معلش انا بكلمك دلوقتي بس لو كان في امكانية انا عاوز اقابلك ضروري عند العمارة
طلبت من السواق يوديني العنوان بتاع العمارة.. ووصلت عشان الاقي مفاجأة مكنتش علي بالي… يتبع الجزء الثاني
…
انتظروني في الجزء الثاني من قصة أوهام الجن واحداث مرعبة جداً وغير متوقعة
أوهام الجن
الجزء الثاني
لقيت الاستاذ عماد ماسك في البلكونة وبيصرخ
كان في بلكونة الدور الاخير.. وبيقول
حد يلحقني.. حد يلحقني هتقتلني
طلعت اجري علي فوق.. ولسه وانا طالع سامع صوت صرخات عماد
وصلت الدور السادس.. لقيتها واقفة في الشقة منظرها كان بشع.. جسمها غرقان دم وشها ده متقطع
علي وشها غضب وهي بتبصلي.. وطلع منها صوت لا يمت للبشر بصلة
دورك جاي يا اياد.. الموت جاي ومفيش منه هروب
…
قولتلها
_ سيبيه.. سيبيه يعيش يا صفاء هو ملهوش ذنب
_ ملهوش ذنب.. انت متعرفش حاجة، هيموت لازم هيموت
_ طيب فهميني عاوزة تموتيه ليه؟
ردي عليا.. متسكتيش كده
..
قربت ومهمنيش منها.. عشان انقذه لكن فجأة ظهر حواليا 6 ستات لابسين اسود.. ملامحهم مطموسة
الكابوس عدي قدام عينيا في لحظة
واخر حاجة سمعتها قبل ما افقد الوعي.. كانت صرخة عماد
اللي للأسف وقع من الدور الاخير.. ومات
فوقت لقيت نفسي في المستشفى.. مش فاهم اي حاجة.. أنا اي اللي جابني هنا
انا مربوط في السرير.. في أي انتوا ربطني ليه؟
في الوقت ده باب الاوضه اتفتح ودخل ظابط وسحب كرسي وقعد قدامي.. وقال
..
_ بقولك اي شغل جنان مش عاوز.. هو سؤال واحد
ليه منقذتش عماد.. كل الناس قالت انك طلعت فوق.. قبل ما هو يقع لكن سبته يموت؟
_ ملحقتش.. منا لو حكيت هتقول عليا مجنون
_ لا احكي وانا هصدقك.. متخفش
…
بدأت احكي كل اللي حصل.. وزي ما توقعت الظابط سكت شويه وبعدها انفجر في الضحك.. وقلي
_ انت عارف الكلام ده هيوديك فين.. عارف ولا لا؟
_ منا قولتلك انت مش هتصدقني.. وانا مش مستغرب والله
_ طيب سؤال تاني.. اي اللي وداك العمارة في الوقت ده بالذات؟
_ المرحوم عماد اتصل بيا وطلب يشوفني.. حتي سجل المكالمات هيثبت ده..
طلعت تليفوني وفتحت سجل المكالمات.. والصدمة.. عماد متصلش بيا
يعني اي.. يعني اي الكلام ده
…
الظابط امر اني افضل في المستشفى.. لحد ما تخلص التحقيقات
كان قرار ظالم بالنسبالي.. منا مش مجنون.. والله انا مش مجنون
وبدأت معايا رحلة الحقن المهدئة.. خلاص انا حاسس اني انتهيت
التحقيقات استمرت شهر.. شهر انا في المستشفي متهم بجريمة انا معملتهاش
واخيرا بعد شهر النيابة اثبتت اني برئ من التهمة دي.. بس القضية اتقفلت انتحار
الشهر ده رغم اني كنت عايز اخرج من المستشفي.. الا اني مشوفتش صفاء.. او شبح صفاء بمعني اصح
…
ده كان مطمني شوية.. لكن مكنتش اعرف ان خروجي من المستشفى.. هيخليني اعيد المعاناة تاني
بعد ما خرجت بيومين روحت الشركة.. لقيت المدير بيطلب مني اروح مكان عشان ابدأ فيه شغل..عمارة جديدة.. لكن المشكلة انها قدام نفس العمارة المشؤومة
كنت قلقان وحاولت اعتذر.. لكن المدير فضل يحفزني وقلي
انه واثق اني هعدي الازمة دي.. واني لازم مفكرش في حاجة وارجع شغلي
…
رجعت البيت في اليوم ده.. كنت محتاج انام عشان معايا شغل كتير بكرة.. دخلت الشقة ودخلت اوضتي.. مراتي مكنتش موجودة
مسألتش هي فين؟ انا تعبان رميت جسمي علي السرير ونمت من التعب
بس مينفعش أنام من غير ما احلم.. مينفعش
شوفت نفسي واقف علي سلم سرداب… نزلت وانا مسلوب الارادة الدنيا تحت ضلمة مش شايف حاجة
سمعت صوت ست بتبكي بحرقة
بدأت الدنيا تنور تدريجي.. لقيت الست صفاء بتحفر في الارض لحد ما خرجت جثة.. جثة طفل
فضلت تبكي وتقول
سبتيني ليه يبني.. سبتني ليه؟
وفي لحظة اتلفتت وبصتلي.. نور انعكس علي وشها اللي بقي مخيف بدأ جلدها يتشقق.. وبيخرج من كل حتة في جسمها حشرات.. حشرات مقرفة جداً
…
وصحيت.. صحيت للمرة التانيه مفزوع مش عارف اي اللي انا شوفته ده
وقررت قرار.. قرار غلط.. كنت غبي لما أخدت القرار ده
قررت اني هروح بيت صفاء.. في الشارع المشؤوم
عاوز ادخل بيتها.. عاوز افهم
سألت علي عنوانها.. محدش كان عارف هي كانت ساكنة فين
لحد ما ست دلتني علي اسم الشارع.. طبعاً مش هقدر اقول الاسم.. مش عاوز حد يتأذي بسببي
..
وصلت البيت… بيت قديم جداً دخلت بسهولة.. البيت هو اللي انا دخلته في الكابوس
آثار الحرق في كل مكان.. البيت في أوضتين
دخلت اول اوضة.. كان متعلق فيها صورة لصفاء وواحد معاها.. ومعاهم طفل صغير
صورة لعيلة جميلة وسعيدة
…
خرجت من الاوضة لقيت باب البيت بيترزع.. الكشاف وقع من ايدي في نفس اللحظة اللي اترفعت في الشمعة علي وش عجوز.. وش راجل انا اعرفه صورته جوه.. وقلي بصوت اشبه بالفحيح
متدورش ورانا.. متدورش ورانا
اخرة اللي بيدور ورانا الموت.. الموت يا إياد
وفي اللحظة دي حسيت بضربة في وشي.. وقعت فاقد الوعي.. فوقت لقيت نفسي واقع في الشارع
..
قومت وحاسس جسمي مكسر.. ركبت عربيتي بسوق بالعافية
وصلت البيت علي صوت صراخ مراتي.. دخلت البيت اجري.. لقيت مراتي وعيالي متحصرين من ال6 ستات اللى موجودين دايما مع صفاء
وكل ما الستات دول يصرخوا مراتي وعيالي يتشنجوا وجسمهم يتنفض.. صرخت فيهم وفي صفاء اللي واقفة قدامي ومبسوطة.. وقولت انا مليش ذنب في موتك.. وعيالي ملهمش ذنب.. قوليلهم يبعدوا عن عيالي.
كانت ساكتة وعلى وشها ابتسامة انتصار.. كنت سامع صرخات عيالي ومراتي.. وانا بصرخ فيها وبقول هما ملهمش ذنب.. اقتليني أنا
فوقت علي صوت مراتي بتقولي اصحي.. اصحي ده كابوس
فوقت وقومت من السرير عشان اشرب
لكن انا لقيت مراتي في الصالة
رجعت الاوضة عشان اشوف مين الي صحتني دلوقتي.. وهنا كانت الصدمة.. مراتي برضو علي السرير.. انا مسكت دماغي حاسس بصداع مين فيهم مراتي… وفي سؤال اهم كمان
يعني اي انا بحلم.. يعني انا مرحتش بيت صفاء؟
في اللحظة دي.. مراتي اللي في الصالة اختفت
…
سألت نفسي.. هو انا ممكن اكون اتجننت فعلا؟
بصيت في الساعة كانت 8 بليل.. نزلت من البيت ركبت عربيتي وروحت للست اللي سألتها عن بيت الست صفاء.. وقولتلها
_ هو انا سألتك قبل كده عن بيت الست اللي ماتت هنا تحت العمارة اللي اسمها صفاء؟
_ لا يبني.. وبعدين انت بتقول ماتت فين.. تحت عمارة مين؟.. الست صفاء ماتت من زمان محروقة في بيتها
_ انتي بتقولي اي يا ست انتي؟
_ انا هحكيلك كل حاجه.. انت مش اول واحد ياجي يسال عليها.. انا هحكيلك حكاية الست صفاء
…
انا سمعت من الست حكاية من ألف ليلة وليلة وطبعا عاوز اقولكم هي قالت اي.. يتبع الجزء الثالث والاخير
…
انتظروني في الجزء الثالث والاخير.. واللي في سؤال مهم جداً.. اي حكاية الست صفاء؟
…
أوهام الجن
الجزء الثالث والاخير
عاوزكم تركزوا في الكلام اللي جاي وتعرفوا أصل الحكاية
الست قالت
صفاء كانت بنت غلبانة عايشة مع جوزها عزت وابنها حاتم.. جوزها كان انسان مش كويس كان بيطلعها هي تشتغل وتصرف عليه
رغم كده صفاء كانت بنت جميلة جداً.. والكل كان مستغرب هي أزاي متجوزة واحد زي ده
_ معلش يعني يا ست.. كان ماله جوزها يعني؟
_ كان ليه في طريق قراية كتب السحر ومضيع وقته كله فيها.. وصفاء كانت رافضة طريقة العيشة دي بس كانت هتعمل ايه
المهم
من ضمن البيوت اللي كانت بتخدم فيها صفاء.. كان بيت الاستاذ عماد.. اكيد انت تعرفه
اللي مات تحت العمارة قريب.. كان شخص مش محترم.. الكل كان عارف انه بتاع كاس وليه علاقات مشبوهة
لكن تعمل اي يبني.. أكل العيش
في يوم أسود اتفق عماد مع واحد صحبه انهم يستدرجوا صفاء للشقة.. وطلب عماد من صفاء انه عايز منها تنضف الشقة وهيديها فلوس كويسة
في الوقت ده حاتم ابنها كان تعبان.. وكانت محتاجة الفلوس وراحت واخدت ابنها معاها
وللاسف المجرمين اعتدوا عليها قدام ابنها اللي شاف كل حاجه وحاول يهرب.. لكن المجرمين مكفهمش انهم اعتدوا عليها لا.. دول قتلوا ابنها قدام عينيها
ودفنوه في سرداب تحت البيت
…
رجعت صفاء لجوزها تصرخ وتقول اللي حصل.. بس رد فعل جوزها كان غريب.. دخلها الببت وقفل الباب وهو ساكت
محدش دافع عنها حتي جوزها.. بس محدش عارف ان اللي جاي كان خراب.. جوز صفاء حضر جن موكل بالخراب عشان ياخد حق مراته وابنه.. لكن عشان ده يحصل كان لازم قربان.. وده فعلا اللي حصل الست صفاء وهبت نفسها للجن.. عشان تخرج للشارع واحدة تانية.. مش صفاء اللى نعرفها
شيطانة اتسببت في حرق كل بيوت الشارع.. الناس كانت خارجة من بيوتها تصرخ.. واللي كان مع عماد لما اعتدوا علي صفاء
لقيوا جثته متفحمة.. كل الناس هربت من بيوتها وسابوا الشارع وعماد كمان هرب
لكن بعدها بيت صفاء ولع لوحده اتحرق ومحدش فاهم السبب
لحد ما اتسببت في موت عماد كمان.. هي السبب في انتحاره.. عشان من صفات الجن ده علي حسب كلام الناس.. هي وهم الشخص اللي قدامه واقناعه باحداث محصلتش
…
خلصت الست كلامها.. وانا كنت مصدوم من اللي سمعته، ركبت عربيتي عشان أمشي.. لكن حسيت بألم رهيب في كل جسمي
حسيت أني مشلول عن الحركة
أستمر الوضع كده نص ساعة بحالها.. وبعدها قدرت اتحرك
لأول مرة اقلق على نفسي.. لا انا لازم بكرة أروح اعمل تحاليل واطمن علي نفسي
…
فعلاً تاني يوم روحت عشان اعمل تحاليل وفحوصات كاملة
عملت التحاليل وكنت في انتظار النتيجة.. لكن تليفوني رن.. كان حمايا رديت عليه.. قلي
_ ازيك يبني اي الاخبار؟
_ الحمدلله انا بخير
_ اي الغيبة الطويلة دي.. ما تجيب مراتك والعيال وتجيوا تقضوا اليوم عندنا
_ حاضر يا عمي.. اخلص مشوار معايا ونجيلك
..
في الوقت ده الدكتور قلي انه عاوزني عشان التحاليل.. دخلتله
قلي
_ التحاليل بتاعتك كلها سليمة.. مفيش غير حوار العقم بس
_ عقم اي يا دكتور؟
_ انت عندك مشكله في الانجاب.. انت متعرفش؟
…
سبت الدكتور وخرجت من غير ما اسمع باقي كلامه
خرجت وانا زي المجنون.. يعني اي.. يعني اي؟
دول مش عيالي؟ مراتي بتخوني مع مين؟
رجعت البيت.. ملقتهاش
اتصلت بوالدها.. قال لا مجتش عنده
فضلت مستني لحد ما رجعت.. وسألتها كانت فين؟
قلتلي انها كانت بتجيب طلبات للبيت
واجهتها بكلام والدها انها بقالها فترة مش بتزوره
انكرت وقالت انها بتزوره كل فترة.. وكانت عنده من يومين!!
..
اتصلت بوالدها عشان افهم هو قال كده ليه؟
والصدمة والدها انكر انه كلمني من الاساس
مكنتش فاهم اي اللي بيحصل بالظبط.. لكن انا مش هكدب نفسي.. طلعت التحاليل عشان اتأكد اني روحت للدكتور منا خلاص بقيت مجنون
التحاليل موجودة.. والنتيجة اني عقيم
بدأت اراقب مراتي.. كل ما تخرج اخرج وراها
اقدر اقول اللي بيدمر اي بيت في الدنيا الشك.. وانا كان عندي يقين انها خاينة
واتأكدت من ده لما شوفتها داخلة عمارة وطلعت رايحة لواحد اسمه مروان علي حسب ما عرفت من البواب
..
متسألنيش مطلعتش وراها ليه؟ انا نفسي معرفش
رجعت البيت طلعت مسدسي.. وبمجرد ما رجعت وبدون اي كلام.. ضربتها بالرصاص لكن لقيت غصب عني كأن حد مسك ايدك ووجه المسدس ناحية عيالي وقتلهم
الدنيا اتقلبت والشرطة جات واتقبض عليا.. وطبعا حكيت اللي حصل.. واتحكم عليا اني اقضي 25 سنة في مستشفى الامراض العقلية واديني خرجت وقررت احكي.. وسمعت عنك وجتلك
……..
خلص إياد القصة اللي حكاها.. وانا حاسس اني قدام شخص مجنون.. طلبت منه يمشي دلوقتي.. ويعدي عليا بكرة
وفعلا مشي
طلعت تليفوني واتصلت بالدكتور نصر.. ده دكتور في مستشفى الامراض العقلية
وسألته عن إياد.. اخد مني الاسم بالكامل.. وقلي شوية وهيكلمني
…
بعد ساعة اتصل بيا الدكتور نصر وقال
_ ده إياد ده حكايته حكاية.. دخل المستشفى اول مرة في سن العشرين بعد ما قرأ مجموعة كتب ليها علاقة بالسحر زي كتاب شمس المعارف
كان عنده هلاوس سمعية وبصرية.. وكان بيختلق حكايات محصلتش.. ودخل الممرضة صفاء معاه في قصة وطلعها دجالة
وخرج من المستشفى بعد فترة من العلاج.. ورجع تاني متهم بقتل مراته وعياله
وقضي 25 سنة في المستشفى.. ولسه خارج من يومين
..
اظن كلام الدكتور نصر واضح.. إياد مريض نفسي دخل في مرحلة قراية كتب الجن والسحر.. وده خلاه يدخل في دايرة أوهام الجن.. وده خلاه يختلق حكايات من دماغه ويألف قصص ومش بعيدة يدخلني انا شخصيا في قصة
صعوبة المرض النفسي.. اكتر مليون مرة من العضوي
المرض النفسي بيخلي اللي قدامه شخص تاني.. لكن وجود جن مع إياد من عدمه انا مقدرش اقول ده حصل ولا لا
…
تمت
